Орал шаһарына барған сапарда біз өңірдің бай тарихымен тереңірек танысу үшін ең алдымен Батыс Қазақстан облыстық тарихи-өлкетану музейіне ат басын бұрдық. Өйткені Жайық өңірінің бірнеше ғасырлық шежіресі, көне дәуірден бүгінге дейінгі тағдыры дәл осы музей қабырғасында сақталған. Мұнда тас дәуірінен қалған археологиялық жәдігерлер, Алтын Орда кезеңінің мұралары, Тақсай ханшайымына қатысты құнды деректер, қазақ хандығы дәуірінің қару-жарақтары, Алаш қайраткерлерінің құжаттары мен Ұлы Отан соғысына қатысты тарихи материалдар жинақталған. Ғасырдан астам тарихы бар көне ғимараттың әр залы Жайық өңірінің әр кезеңін баяндайды. Бір қарағанда қарапайым экспонат болып көрінетін көптеген жәдігердің артында тұтас бір дәуірдің тарихы жатыр. Сондықтан бұл музей тек көне бұйымдар қойылған орын емес, Батыс Қазақстанның тарихи жадын сақтап тұрған маңызды рухани орталықтардың бірі саналады.